Catherine Boivin ×
Erica N. Cardwell

Mirwatisiwin e icinakok

Ni apitc ka kitciparik nihe 2021 (e ki atcictakaniwokipan ni apitc ke ki cenikatekipan 2020)mia tca ki isparin e pa pimatisiapan e kiwotamak nictaw. Ni apitc namekosi pisimw mia e micta kicitekipan neta Moriak nihe ko ka takickakoiikw e micta miromowak e natowi aitotcikatek ka takickakoiikw ka atciparik tan e iti aicikicikak. Ni maninen nikapotowan acitc nimocowem epwamoci pitakeian ite e ici actakaniwok ka wapatariwaniwok kitci kekwan. Naha tca ka nikanipictak Lori Beavis ni ki pe micta miro nakickakw nte otananik ni ki nta apinan napitc warowicic ni ki apinan osam nihe ka pimotemakak akosiwin mitci akikw ka ki icinikatakaniwitc kaskina ka ki takickakoiikw. Naha tca otci e ki kicterimakaniwitc Daphne Odjig. Nihe ka ki ocitakananiwok apitc ka matcatakaniwok ki ni mitcetiwok ka ki matcatatcik nehirowisiwok ka miwotatcik ko wectakanikaniw aniki tca Skawennati, Hannah Claus, Nadia Myre acitc Caroline Monnet. Nihe daphne ekote kaie wir e ici wapatak kitci ici pimotemakanik mia mitowi ka ici miwotatc  Odijig, New Warehouse Gallery apitc ka cenak 1974 nete Winnipeg ki rikihamakan irikik ke tatcik ke wectakaniketcik kitci kiskeritakositcik misiwe e kanawapamakaniwitcik ka wectakaniketcik kekwariw kitci wapatcikaterik ote misiwe Kanata askik.

Ni tca apitc kiapatc e miromowak e ickwa apita kicikak aric ma kaie e rotik mikomini pisimw 2022, ni ki koski ican neta daphne kitci nta kanawapatamokw ka ici kackitatc otamirowin ewapatariwetc naha Catherine Boivin e ki icinikatak Nikotwaso. Ki iteritakon neta Moriak aci miskam mirerimowiniw acitc mireritamowiniw e ki kipotisinaniwok nico pipona. Naha tca Boivin acitc nin ki miroparin kitci nakickotatoiak. E tca micta miro nokosiak pitoc e iskwakosiak orina nin e micta takwaskosian acitc aka orina e miro emitikocimoian orina ni ki witerimitisonan e aimihitoiak.Ni ki natowi aitotenan kitci miro nisitotatoiak. Nac erowek ni ki petakotanan tan e aiteiak. Ni ka masinahen tan ka ki ici kokwetcimak niheriw e arimotak Nikotwaso acitc Boivin kitci tca petakotaian tan ici naskamotc e emitikocimotc. Stéphanie Guico ni micta ni miro nikwimes e miro witcihiwetc e ici otamironaniwok acitc e micta kackitatc wir kata itectamakew.

Naha Catherine apitc ke kiskeritak niheriw Nikotwaso mekwatc e pamipatatc. Nihe ka icinikatek callisthénie acitc kokwetcihowin e wi mirokanehitisotc ekweriw ka pimatisiwaketc naha Catherine Boivin. Tato kickwa niheriw e totak mirockako mirerimowakew nte otacikewinik otaskik ite e ici aitaritci owitcicana Atikamekw. Irikik ko e pa mipatatc mocak peikon kiskerimew otaniskwi omocoma kaie otaniskwi okoma mekwatc e pa aitaciniritci otaskiwak. Ite kotc pe pa aitakosketc acitc nte owiak e kiskerimak e capockakotc e pa witacikemikotc ite ka ki ici pa pimatisiritci. Niheriw tca ka ki ici kiskeritak mackowariw e awocamec e wi nanto kiskeritak. Kokwetcimitiso Boivin: « Kecpin tca kotci petakotaian mekwatc e mipataian acitc kitci nokotaian kekwan ka wapataman?»

E itemakak Nikotwaso witcikemakan nihe akitason e nehiromonaniwok. E icinakok nihe otamirowin ka nokok neta masinactetcitcikanik ekoni irikik e nokositcik e nikotwasotcik  iskwewok ekote e ici aspictek e nikotwasoki e aistaiaki ko tan e aititoskaniwok e pa aitacinaiwok notcimik kaie nihe e aspictek e sikok kaie e pitcipipok tan kotc e icinakonik atikamekw nehirowisiw otaititoskewina. Papeikw iskwewok nokotawok e aiataiarik tan e ici pimotemakak pimatisiwin tan kotc e aistaiak. Ekote e ici wapatariwetc naha Catherine Boivin : « e icinakok pipatisiwin irikik peiko pipona tan kotc e ici ainisko pakitinikatek kiskinohamakewin e matinamakaniwok». E ki itactakaniwok anihi ka masinacteteparik waskactakaniwono e nokotakaniwok tca nte osit peikw iskwew acitc e nokonik otakopik e kakikesinaterik ka ki icihotcik weckatc iskwewok mocak  tca nte aiaskwi e nokoki. Papiwe tca niki iskwewok ototewok : nimiskwewok tawok ka neta ka tohetcik acitc tawok nete e ototetcik ka ici taciketc Boivin enkweriw ka ki wi nokotatc.   « kaie nin neta ni nokosin», itew naha Boivin.« kitci ki miro kiskerimitisonaniwok mamo e ici pimotaniwok tapickotc e itapikecininaniwok neta ka ici masinacteparik». Kaskina papeikw iskwewok icihowok tan kotc ka ki ici nakatamakotcik atikamekw nehirowisiwa.« kimocimonook ki kokominook acitc kinikihikonook kotc ka ki icihotcik atikamekw nehirowisiwok weckatc». Kaskina anihi wikasia otcirowemakana naha Boivin ka ki ocitariritci. « Nihi ka riwepasona enko  ka witcikemakak  nihe otci kwakwapicicicimowin ka wapatamok ko e opwakanahanicimonaniwok enko tca nihe ka ki wi wapatariweian.

Catherine Boivin, Nikotwaso, 2022. Photo: Mike Patten. Avec la permission de daphne.

Kaskina papeikw iskwewok arimwewok petakoniw otitewiniwaw «miro aitewiniw cawerimi aitewiniw miro kekwariw ici petakoniw» neta ka ici petakotakaniwonik e tetipawetakonik. Witam naha Catherine Boivin tan e ici tipatitamakan ka ki ici takickakonaniwok opimatisiwininak acitc « anotc ni wi wi maninenan anihe kaskina ka ki pe akohikoiak e ki aniskwi takickakoiak e ki aniskwi mirikoiak. Ni wi nakahenan. Nte e ici aniskwictamakoiak ni wi natcipatamason nihe ka ki pe ici mirwacik kaskina anihi ka ki mirowinakok». Kitci wapatcikatek anihi kaskina.aniki tca ke kanawapatakik Nikotwaso neta tetawitc kata apiwok kitci ki miro nakwectatcik kaskina. Ni ki wapamawok atita notc e ki cakwerimotcik e kanawapatakik napitc nakewar e otapatakik kekotc aka e pitaketcik neta ka ici waskactek ki tawok aric tapwe tca napitc wewerita e ki wi kanawapatakik kaie atita tepirak nikiska e ki tasipitakik. Ki tawok kaie warowik ka ki otapatakik e kanawapamatcik anihi ka pe nta pitakeritci neta ka ici waskarik. « neta nit ici apihawok ka pe icatcik pitakamik waskak kitci miro takickakotcik miro kekwariw kitci miro wikwekickakotcik mirwatisiwiniw. Wikosimakaniwok tca kitci miro nosanetatcik tan e iti itacteparinik kitci iti nosanehak e itacteparinik».

Kecpin e kokwetcimak tan e ici wapatak ka ki ici nakatamowakaniwitc ka ki aniskwimirakaniwitc otirosowinik itekera tecikotc nte ici mikawiw notcimik e ki pa aitaciketc kirika okawi e ici mikawitc e wapamatc okawi e taci weciharitci namesa. « ni enko nihe ka ki ici wapatarikoian». Ki pa kanawapatam Catherine Boivin ka pa itisinaterik neriw instagram e masinaterik ka ki ici pa mirokanehitisotc. Pa witacikemiko otanisa e pa keskinawapamikotc e kokwetcihotc kitci mirokanetc kaie e taci apiritci nokosiriw kekotc e iskwatowitatakotc oskatik e mekwatc kokwetcihotc e ocpiskateritc. Anotc mekwatc e tcotcowitc itew Boivin enko nihe aniskwictamakewin e motci aimihakaniwitc e motci witamowakaniwitc.« kaskina nihi atisokana kata kictapatan. Kecpin e nehirowimoiak nitanis e atisokowak mirwatikwatc ni wir otci kata mirockickako kitci petak onehirowimowin awocamec petake kata nahi kiskeritam tan wa itemakanik». 

Ockatisiw naha ka mitcetowi kackitamasotc kekwariw  nehirowiskwewiw naha Catherine Boivin mitcetotaw kekwariw ka ici nokotatc masinacteparitaw, masinasowina apatcihew, orikotcikaniw acitc mantokasowiniw. Apitc ka nitawikitc 1989 nte Wemotaci otciw (Québec) apitc ka masinacteparitciketc nihe ka totcikatek De tabac et de foin d’odeur. Là où sont nos rêves. Au musée d’art à Joliette(Québec,2019) e icinakonik otamirowin ka ki ici werictatcik acotcicteriw neta Essence et régalia à l’espace culturel Ashukan (2019). Acitc kaie wir ki totam niheriw e wapatariwaniwonik neta  e metowaniwonik acitc tan e icinakonik nehirowisiw owectakanikan (2017) aniki ka ocitatcik Productions Ondinnok, neta ka Mamowinitotcik nehirowisiwok  owectakaniketcik  (2017) niheriw kaie ko  Otacikewiniwaw nehirowisiwok (2019) .au Rassemblement internations d'art performance autochtone (2017) et à Présence autochtone (2019).